རྒྱལ་ནང་གི་འཕྲུལ་རིག་བཟོ་ལས་ཁང་ཁག་གི་འཕེལ་ཚད་དང་ཁྱབ་རྒྱ་ཆེ་དྲགས་པ་བརྟེན་ནས། ཁོང་ཚོའི་ཐོག་ཏུ་གཞུང་གི་དོ་དམ་ཚན་ཁག་གི་གནོན་ཤུགས་ཆེན་པོ་སླེབས་ཡོད།
ད་བར་ཐིན་ཞུན་（腾讯）བཟོ་ཚོང་ཁང་གི་སོ་སོའི་ཚོང་རའི་རིན་ཐང་གི་ཁྲོད་ནས་ཨ་སྒོར་དུང་ཕྱུར་༦༠༠་ལྷག་གི་ཁེ་སྤོགས་བཟོས་ཡོད་ལ། གཞུང་གི་གནོན་ཤུགས་ཆེ་རུ་ཕྱིན་པ་ལ་བརྟེན་ནས། ཁོང་ཚོའི་མ་རྐང་གི་ཆ་ཤས་ཀྱི་རིན་གོང་ཅུང་མར་ཆགས་ཡོད།
གསར་ལམ་དུ་གནས་ཚུལ་ཐོན་གསལ་ལྟར་ན། ཐིན་ཞུན་གྱི་དོ་ཟླ་ཡིན་པའི་ཨ་ལི་བྷ་བྷ་འཕྲུལ་རིག་བཟོ་ལས་ཁང་གིས་ཀྱང་གཞུང་གི་གནོན་ཤུགས་འོག་སོ་སོའི་ཆ་འཕྲིན་རྒྱུ་རྫས་ཁག་ཅིག་བཙོང་དགོས་སྲིད་ཀྱི་ཡོད་འདུག གང་ཡིན་ཞེ་ན། གཞུང་གི་ཚོང་རའི་དོ་དམ་ལྷན་ཁང་གིས་འཕྲུལ་རིག་བཟོ་ལས་ཁང་ཁག་གི་ཐོག་ཏུ་སྔར་ལས་ལྷག་པའི་དམ་དྲག་བྱེད་རྒྱུ་ཡིན་པའི་རྣམ་འགྱུར་བསྟན་ཡོད།
རྒྱལ་ཁབ་ཀྱི་ཚོང་རའི་ལྟ་སྐུལ་དོ་དམ་སྤྱི་ཁྱབ་ལྷན་ཁང་གིས་བརྗོད་གསལ་ལྟར་ན། རྒྱལ་ཁོངས་ཀྱི་བཟོ་ཚོང་ཁང་༡༢་ཡི་ཚོང་འབྲེལ་གྱི་བྱེད་སྒོ་༡༠་ཙམ་གྱིས་ཚོང་དབང་གཅིག་འཛིན(སྒེར་སྡེམ)་ལ་རྒོལ་བའི་སྒྲིག་སྲོལ་ལ་འགལ་བར་བརྟེན། གཞུང་གིས་ཉེས་ཆད་བཅད་ཡོད་འདུག་ལ། བཟོ་ཚོང་ཁང་དེ་དག་གི་ཁོངས་སུ། ཐིན་ཞུན་བཟོ་ཚོང་ཁང་དང་། པའེ་ཏུའུ། ཏིས་ཏིས། SoftBank བྷེ་ཁྲི་སྒྲན་སི་དང་བཟོ་ཚོང་ཁང་གིས་རྒྱབ་སྐྱོར་བྱེད་བཞིན་པའི་ཚོང་ལས་ཁང་བཅས་ཚུད་ཡོད་འདུག བཟོ་ཚོང་ཁང་ཁག་གི་ཚོང་རའི་ལས་དོན་བྱེད་ཕྱོགས་སྐོར་ལ་གཞུང་གིས་སྔར་ལས་ལྷག་པའི་དོ་དམ་ནན་མོ་བྱེད་ཀྱི་ཡོད་པ་བཞིན། མི་རིང་བར་ཐིན་ཞུན་བཟོ་ཚོང་ཁང་ལའང་གནོན་ཤུགས་ཕོག་ངེས་སྟབས། བཟོ་ཚོང་ཁང་དེའི་ཁྲོམ་རར་མ་རྩ་འཛུགས་མཁན་ཚོས་གནད་དོན་དེའི་སྐོར་ལ་སེམས་ཁྲལ་ཆེན་པོ་བྱེད་ཀྱི་ཡོད་འདུག
