འཕྲུལ་རིག་གསར་འགྱུར།

དེ་ཡང་པོད་ཕྲན་སྟེང་གི་གནས་ཚུལ་ལ་གཞིགས་ན། སྲིད་གཞུང་གིས་མི་རྣམས་ལ་དྲ་ཐོག་ནས་ངོ་རྟགས་སྤྲོད་རྒྱུའི་སྲིད་ཇུས་ཤིག་འདིང་གི་ཡོད་འདུག་ལ། འཆར་གཞི་དེ་དངོས་སུ་ཚོད་ལྟ་བྱེད་ཆེད། རྒྱལ་ཡོངས་དྲ་རྒྱའི་ངོ་བོ་བདེན་དཔང་ཟེར་བའི་བཀོལ་ཆས(全国网络身份认证APP)་བརྒྱུད་ནས་མི་སྒེར་གྱི་དྲ་ཐོག་གི་ངོ་རྟགས་དེ་ཨང་ཀི་དང་གསལ་བྱེད་ཡི་གེ་ལས་གྲུབ་པ་ཞིག་བཀོལ་སྤྱོད་བྱེད་རྒྱུ་རེད་འདུག རྒྱལ་ཁབ་གཞན་དང་མི་འདྲ་བར་རྒྱལ་ནང་དུ་དྲ་རྒྱའི་ཞབས་ཞུ་གང་རུང་ཞིག་གི་ཐོག་ཏུ་མིང་ཐོ་འགོད་སྐབས། འཛད་སྤྱོད་པའི་ཡིག་ཟམ་ཨང་གྲངས་དང་ཐོབ་ཐང་དཔང་ཡིག་སོགས་མི་སྒེར་གྱི་གནས་ཚུལ་རྣམས་ངེས་པར་དུ་ཡང་སྤྲོད་བྱེད་དགོས་པ་དང་། ཀྲུང་གོའི་སྤྱི་བདེ་པུའུ་དང་དྲ་རྒྱ་དོ་དམ་ཅུས་(公安部和国家互联网信息办公室)གཉིས་ཀྱིས་གསལ་བསྒྲགས་བྱས་པའི་ཁྲིམས་འཆར་གྱི་ཡིག་ཆའི་ནང་དུ། མི་སྒེར་གྱི་དྲ་ཐོག་གི་ངོ་རྟགས་དེ་བཟོ་དགོས་པའི་དམིགས་ཡུལ་ནི། དྲ་སྟེང་གི་བརྒྱུད་ལམ་འདྲ་མིན་དུ་མི་སྒེར་གྱི་གནས་ཚུལ་ཚད་ལས་བརྒལ་བ་བསྡུ་རུབ་བྱེད་ཀྱི་ཡོད་པ་ཇེ་ཉུང་དུ་བཏང་ནས། མི་སྒེར་གྱི་གནས་ཚུལ་དང་ཆ་འཕྲིན་བདེ་འཇགས་སྲུང་སྐྱོབ་བྱ་རྒྱུ་ཡིན་པ་གསལ་ཡོད། དྲ་སྟེང་གི་ངོ་རྟགས་དཔང་ཡིག་དེ་རག་པར། འཛད་སྤྱོད་པས་རང་ཉིད་ཀྱི་ཐོབ་ཐང་དཔང་ཡིག་དེ་གཞུང་གིས་བཟོས་པའི་APP་ནང་དུ་ཡར་འཇུག་བྱེད་དགོས་པར་མ་ཟད། རང་ཉིད་ཀྱི་ངོ་གདོང་བཤེར་ཏེ་ངོ་བོ་ར་སྤྲོད་བྱེད་དགོས་ལ། ད་དུང་རང་གི་ཁ་པར་ཨང་གྲངས་དང་དངུལ་བྱང་སོགས་ལའང་སྦྲེལ་དགོས་ཀྱི་ཡོད་པ་རེད། དེ་བས། ཆིན་ཧྭ་སློབ་ཆེན་གྱི་ཁྲིམས་ལུགས་སློབ་གླིང་གི་སློབ་དཔོན་ཆེན་མོ་ ལོ་ཏུང་ཡན་(劳东燕)གྱིས། པོད་ཕྲན་སྟེང་དུ།…

འཛམ་གླིང་གི་འཕྲུལ་རིག་བཟོ་ལས་ཁང་གྲགས་ཆེ་ཤོས་གྷོ་གྷིལ(谷歌)་བཟོ་ཚོང་གི་ཐོན་རྫས་གྲགས་ཆེ་ཤོས་ནི། གྷོ་གྷིལ་འཚོལ་བཤེར་མ་ལག་ཡིན་ལ། དེའི་ནང་དུ་འཛམ་གླིང་གི་གནས་ཚུལ་ཆེ་མ་ཆུང་གསུམ་ག་འདྲ་ཞིག་བཙལ་རུང་། མི་རག་པ་ཞིག་ཧ་ལམ་མེད། འཚོལ་བཤེར་མ་ལག་ཙམ་མ་ཟད། གྷོ་གྷིལ་བཟོ་ཚོང་ཁང་ལ་འཛམ་གླིང་ན་འགྲན་ཟླ་བྲལ་བའི་ཐོན་རྫས་གཞན་པའང་མང་པོ་ཡོད་དེ། དཔེར་ན། གྷོ་གྷིལ་ས་ཁྲ་དང་།(Google 地图) གྷོ་གྷིལ་ཡིག་ཟམ།(Gmail) གྷིལ་གྷིལ་ཡིག་གདན།（Google Doc） ཡོ་ཁྲོ་ཕི་དྲ་བརྙན། (Youtube) ཨན་ཌོ་མ་ལག(安卓) གྷོ་གྷིལ་ཡིག་སྒྱུར་（Google 翻译）སོགས་མང་པོ་ཡོད་པ་དེ་དག་གི་ཁྲོད་ནས། འདིར་གྷོ་གྷིལ་ཡིག་སྒྱུར་གྱི་སྐོར་ལ་རོབ་ཙམ་བཤད་འདོད།…

ཉི་ཧོང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་འཛམ་གླིང་ནང་དུ་སྔར་བྱུང་མ་མྱོང་བའི་གཞི་གྲངས་བརྒྱུད་གཏོང་གི་བྱེད་ནུས་ཧ་ཅང་ཆེ་རུ་གཏོང་ཐུབ་པའི་6G ཐོན་རྫས་ཀྱི་པར་གཞི་ཆེས་སྔ་ཤོས་དེ་ཕྱིར་བསྒྲགས་བྱས་ཡོད།  འདི་ནི་ཉི་ཧོང་ནང་གི་ཚོགས་སྡེ་མང་པོ་ཞིག་གི་མཉམ་རུབ་ཀྱི་རྩོལ་བ་ལས་གྲུབ་པའི་འབྲས་བུ་ཆེན་པོ་ཞིག་ཡིན་ལ། འགྲོ་བ་མིའི་རིགས་ཀྱི་དྲ་རྒྱའི་འབྲེལ་མཐུད་ཀྱི་ལོ་རྒྱུས་ཁྲོད་ཀྱི་གསར་གཏོད་དང་མདུན་མཆོང་གི་གོམ་པ་ཞིག་ཀྱང་ཡིན།  6G་ཐོན་རྫས་གསར་པ་དེའི་གཞི་གྲངས་བརྒྱུད་གཏོང་གི་མགྱོགས་ཚད་ནི། སྐར་ཆ་གཅིག་གི་ནང་དུ། 100GB ཡིན་ལ། ཁྱེད་ཀྱིས་སྐར་ཆ་གཅིག་གི་ནང་དུ་HD སྤུས་ཚད་ཅན་གྱི་གློག་བརྙན་5་ཕབ་ལེན་བྱེད་ཐུབ་ཀྱི་ཡོད། དེ་ནི་ད་ལྟའི་5G ལས་ལྡབ་20་ལྷག་ཙམ་གྱིས་མྱུར་བ་ཡོད་སྟབས། སྐུད་མེད་འབྲེལ་མཐུད་ཀྱི་མགྱོགས་ཚད་དེས་འཛམ་གླིང་ཡོངས་རྫོགས་ཧོན་ཐོར་དུ་བཅུག་ཡོད།  མྱུར་ཚད་དེ་ནི་དངོས་ནས་ཡིད་སྨོན་འཆོར་བ་ཞིག་ཡིན་ནའང་། མི་ཚོའི་རེ་བ་མཐོ་དྲགས་མི་རུང་། གང་ཡིན་ཞེ་ན། 6G་མ་ལག་དེ་ད་ལྟ་གསར་གཏོད་ཀྱི་གནས་སྐབས་སུ་ཡོད་ལ། དྲ་བའི་མགྱོགས་ཚད་དེ་ནི་ཚོད་ལྟའི་ར་སྤྲོད་ཙམ་ལས་ད་ལྟའི་5G ནང་བཞིན་ཚོང་ལས་ཀྱི་ཁྲོད་དུ་དངོས་སུ་བཀོལ་སྤྱོད་བྱེད་མི་ཐུབ།…

ཀུ་ཤུ་དང་སེམས་སོང་སོགས་འཛམ་གླིང་གི་ཁ་པར་བཟོ་ལས་ཁང་ཆེ་ཁག་གིས། ད་ཆ་ཁ་པར་ཚང་མའི་ནང་དུ་ཡོད་པའི་འགྱིག་གི་བྱང་བུ་དེ་མེད་པར་བཟོས་ཏེ། དེའི་ཚབ་ཏུ་གློག་རྡུལ་གྱི་བྱང་བུ་བཟོ་བཞིན་ཡོད་ལ། འཕྲུལ་རིག་ལག་རྩལ་འདི་ལེགས་འགྲུབ་བྱུང་ཚེ། བཟོ་ལས་ཁང་ཆེ་ཁག་འདི་དག་གིས་རྒྱལ་ཁབ་འདྲ་མིན་གྱི་ནང་དུ་འགྲུལ་བཞུད་བྱེད་མཁན་གྱི་མི་ཚོའི་འཚོ་བར་སྟབས་བདེ་བསྐྲུན་ཐུབ་པ་ཟད། ཁ་པར་ཨང་གྲངས་ལས་སླ་པོའི་ཐོག་ནས་བརྗེ་ཐུབ་ཀྱི་ཡོད་སྐོར་བརྗོད་ཀྱི་འདུག གློག་རྡུལ་བྱང་བུ་ནི་ཅི་ཞིག་ཡིན། གློག་རྡུལ་བྱང་བུ་མ་གླེང་བའི་གོང་དུ། བྱང་བུའི་སྐོར་ལ་མཚམས་སྦྱོར་ཐུང་ཐུང་ཞིག་བྱེད་འདོད། བྱང་བུ་ནི་སྤྱི་ལོ་༡༩༩༠་ཡས་མས་སུ་བྱུང་ཞིང་། དང་ཐོག་དངུལ་བྱང་གི་ཆེ་ཆུང་ཙམ་ཞིག་ཡོད། དེ་ནས་རིམ་བཞིན་འགྱུར་བ་ཕྱིན་ཏེ། དེང་སང་གི་སེན་མོའི་ཆེ་ཆུང་ཙམ་ཞིག་ཡོད་པ་འདིར་གྱུར་བ་རེད། བྱང་བུ་རེ་རེར་རྒྱལ་སྤྱིའི་འཛད་སྤྱོད་པའི་ID་རེ་སྤྲད་ཡོད། དེ་བརྒྱུད་ནས་ང་ཚོ་ངོས་འཛིན་བྱེད་ཐུབ། འདི་ནས་ཕར་བརྩིས་པའི་ལོ་ཁ་ཤས་ཀྱི་ནང་དུ་བྱང་བུ་དེ་གཏན་དུ་མེད་པར་བཟོས་ཏེ། གློག་རྡུལ་གྱི་ངོ་བོར་བསྒྱུར་རྒྱུ་རེད། དེ་ལེགས་འགྲུབ་བྱུང་ཚེ།…

འཛམ་གླིང་གི་གསར་ཁང་ཁག་གི་ནང་དུ་གནས་ཚུལ་ཐོན་གསལ་ལྟར་ན། ཨ་རིའི་འཕྲུལ་རིག་བཟོ་ལས་ཁང་གྲགས་ཅན་ཀུ་ཤུ་བཟོ་ཚོང་ཁང་གིས་མི་འགྱངས་བར་ཐོན་ལ་ཉེ་བའི་ཀུ་ཤུ་ཁ་པར་ཐོན་༡༦་དང་། ཀུ་ཤུ་རྩིས་འཕྲུལ། ཀུ་ཤུ་ཉེར་སྤྱོད་མ་ལག་ཐོན་༡༨་བཅས་ཀྱི་ནང་གི་མིས་བཟོས་རིག་ནུས་ཀྱི་ཞབས་ཞུ་ཁག་རྒྱལ་ནང་གི་འཚོལ་བཤེར་མ་ལག་གྲགས་ཅན་བརྒྱ་འདུས（百度）་ལ་མཁོ་སྤྲོད་བྱེད་དུ་འཇུག་རྒྱུ་ཁས་ལེན་བྱས་ཡོད་འདུག ད་ལོ་ནས་བཟུང་། ཕྱི་རྒྱལ་གྱི་ཀུ་ཤུ་ཁ་པར་ཁག་གི་ནང་དུ་ཀུ་ཤུ་བཟོ་ཚོང་ཁང་རང་ཉིད་ཀྱིས་བསྐྲུན་པའི་མིས་བཟོས་རིག་ནུས་ཀྱི་མ་དཔེ་བཀོལ་སྤྱོད་བྱེད་རྒྱུ་རེད་འདུག་ལ། རྒྱལ་ནང་གི་ཁྲིམས་དང་སྒྲིག་གཞི་གཞིར་བཟུང་སྟེ། རྒྱལ་ནང་གི་ཀུ་ཤུ་ཁ་པར་བཀོལ་མཁན་ཚོའི་ཁ་པར་གྱི་ནང་དུ་བརྒྱ་འདུས་བཟོ་ཚོང་ཁང་གིས་བཟོས་པའི་མིས་བཟོས་རིག་ནུས་ཀྱི་མ་དཔེ་སྤྱད་དེ་འཛད་སྤྱོད་པའི་དགོས་འདོད་བསྐང་རྒྱུ་རེད་འདུག དོན་དག་འདི་ཉེ་ལམ་ཀུ་ཤུ་བཟོ་ཚོང་ཁང་གི་འགན་འཛིན་སྐུ་ཞབས་ཁོ་ཁིག་ལགས་རྒྱལ་ནང་ལ་གཟིགས་སྐོར་ལ་ཕེབས་པའི་སྐབས་སུ་རྒྱལ་ནང་གི་བཟོ་ལས་ཁང་ཁག་ཅིག་དང་གྲོས་མོལ་བྱས་མཐར་ཐག་གཅོད་གནང་བ་ཞིག་ཡིན་འདུག  ཐག་གཅོད་འདི་ལྟར་གནང་དགོས་པའི་རྒྱུ་མཚན་གཅིག་ནི་སྲིད་གཞུང་གི་ཁྲིམས་དང་འབྲེལ་བ་ཆགས་ཡོད། གང་ཡིན་ཞེ་ན། ན་ནིང་གི་ཟླ་༨་པའི་ནང་དུ། སྲིད་གཞུང་གིས་རྒྱལ་ནང་གི་མིས་བཟོས་རིག་ནུས་ཀྱི་ཞབས་ཞུ་ཁག་དོ་དམ་བྱེད་སྟངས་ཀྱི་སྒྲིག་སྲོལ་ཁ་གསལ་གཏན་འབེབས་གནང་ཡོད་པ་དེས། ཀྲུང་གོ་ནི་འཛམ་གླིང་གི་ནང་དུ་གསར་དུ་ཐོན་བཞིན་པའི་འཕྲུལ་རིག་ལག་རྩལ་གྱི་ཐོག་ཏུ་ཁྲིམས་དང་སྒྲིག་གཞི་ལག་བསྟར་བྱེད་མཁན་གྱི་ཆེས་ཐོག་མའི་རྒྱལ་ཁབ་ཀྱི་གྲས་སུ་སླེབས་སུ་བཅུག་ཡོད།  རྒྱུ་མཚན་གཞན་ཞིག་ནི། རྒྱལ་ཁབ་གཉིས་བར་གྱི་ཚོང་འབྲེལ་དམག་འཁྲུག་ཛ་དྲག་ཏུ་གྱུར་བ་ལ་བརྟེན་ནས། རྒྱལ་ནང་གི་ཀུ་ཤུ་ཐོན་རྫས་ཀྱི་ཉོ་ཚོང་གི་བརྒྱ་ཆ་༢༤་མར་ཆགས་ཡོད་པས་ཡིན། འདི་ནི་ཨ་རིའི་བཟོ་ཚོང་ཁང་ཆེ་ཤོས་ཤིག་གིས་རྒྱལ་ནང་གི་ཁྲོམ་རའི་ཁ་སྤོགས་ལ་རྔམས་ཏེ་ཀྲུང་གོའི་ཁྲིམས་ལུགས་དང་ཚོང་ལས་སྡེ་ཁག་ལ་ཕྱག་འཚལ་བའི་ལེའུ་གསུམ་པ་དེ་ཆགས་ཡོད། …