ཁུ་ལོ་རིག་ནུས (Claud AI)བཟོ་མཁན་གྱི་ཨ་རིའི་བརྡ་འཕྲིན་བཟོ་ལས་ཁང་(Anthropic)ཨན་ཐུ་རོ་ཕེ་ཁིག་གིས། རྒྱ་ནག་གི་མིས་བཟོས་རིག་ནུས་ DeepSeek དང་། Moonshot MiniMax་བཅས་ཀྱིས་ཁུ་ལོ་རིག་ནུས་ཀྱི་ཐོག་ཏུ། གོ་རིམ་དང་རྩ་འཛུགས་ཡོད་པའི་རང་འགུལ་ཅན་གྱི་གཞི་རྒྱ་ཆེ་བའི་འཇབ་རྒོལ་བྱས་ཡོད་ཚུལ་ཡོངས་བསྒྲགས་བྱས་ཡོད། རྒྱ་ནག་གི་བརྡ་འཕྲིན་བཟོ་ཚོང་ཁང་དེ་དག་གིས་ཁུ་ལོའི་སྟེང་དུ་ཐོ་ཁོངས་རྫུན་མ་24,000་ལྷག་བཟོས་རྗེས། དེ་དག་བེད་སྤྱད་དེ། ཁུ་ལོ་མིས་བཟོས་རིག་ནུས་དང་མཉམ་དུ་རྒྱུན་ལྡན་མིན་པའི་འབྲེལ་གཏུགས་དང་གནས་ཚུལ་བརྗེ་ལེན་ཐེངས་ས་ཡ་ 16་ལྷག་ལ་བྱས་ཏེ། ཁུ་ལོ་རིག་ནུས་ཁོངས་ཀྱི་ནུས་པ་བསྔོག་འདོན་བྱས་ཡོད་པ་དང་༌། གཡོ་ལེན་བྱས་པའི་ཁུ་ལོ་རིག་ནུས་ཀྱི་ནུས་པ་དག་སོ་སོའི་རིག་ནུས་ཀྱི་མ་དཔེའི་ཁོངས་སུ་བསྐྱར་སྤྱོད་དང་འདྲ་བཤུས་བྱེད་ཐབས་བྱས་ཡོད་ཚུལ་བརྗོད་ཡོད།
སྙན་ཐོ་ལྟར་ན། ཁུ་ལོ་རིག་ནུས་ལ་གཞི་རྒྱ་ཆེ་བའི་ཐོག་ནས་འབྲེལ་གཏུག་བྱེད་པའི་རྩོལ་བ་དེའི་རྩ་བའི་དམིགས་ཡུལ་ནི། ཤེས་ཡོན་གྱི་བདག་དབང་གཡོ་འཕྲོག་བྱེད་རྒྱུ་དེ་ཡིན་པ་གསལ་འདུག ཞིབ་ཕྲའི་དཔང་རྟགས་མང་ཚོགས་ལ་ཡོངས་བསྒྲགས་བྱས་མེད་ཀྱང་༌། ཉེས་འཛུགས་དེ་དག་གིས་འཛམ་གླིང་གི་བརྡ་འཕྲིན་བཟོ་ལས་ཀྱི་གནས་སྟངས་སྤྱི་དང་༌། ལྷག་པར་དུ་ཨ་རི་དང་རྒྱ་ནག་གི་བརྡ་འཕྲིན་བཟོ་ལས་ཁང་ཁག་བར་གྱི་འགྲན་རྩོད་ཀྱི་གནས་སྟངས་གསལ་པོར་མཚོན་གྱི་ཡོད། འོན་ཀྱང་། དུས་ད་ལྟའི་ཆར། རྒྱ་ནག་གི་བརྡ་འཕྲིན་བཟོ་ལས་ཁང་དེ་དག་གིས་ཉེས་འཛུགས་ལ་ངོས་ལེན་བྱས་མེད།
ཟུར་བཀོད། DeepSeek རིག་ནུས་ཀྱི་མ་དཔེ་གསར་ཤོས་དེ་གཟའ་འཁོར་རྗེས་མའི་ནང་དུ་དངོས་སུ་འདོན་སྤེལ་བྱ་འཆར་ཡོད་པ་བཞིན། ཨ་རིའི་གཞུང་གིས་བརྗོད་ན། DeepSeek ཡི་རིག་ནུས་མ་དཔེ་གསར་ཤོས་དེར་ཨ་རིའི Nvidia བཟོ་ཚོང་ཁང་གི་Blackwell ཟེར་བའི་རིག་ནུས་ཀྱི་ཉིང་ལྷེབ་ཚད་མཐོ་ཤོས་ཀྱིས་སྦྱོང་བརྡར་སྤྲད་ཡོད་པ་དེས། ཨ་རིའི་ཕྱིར་ཚོང་ཚོད་འཛིན་གྱི་ཁྲིམས་ལ་འགལ་ཡོད་པ་བརྗོད་འདུག
ལམ་ཡིག་གི་ཞབས་མཆན། གནས་སྟངས་འདི་དག་གིས་མ་འོངས་པར་རིག་ནུས་ཀྱི་བདེ་འཇགས་དང་༌། གཞི་གྲངས་སྲུང་སྐྱོབ་སོགས་ཀྱི་གནད་དོན་ཇེ་ཆེར་འགྲོ་ངེས་པ་དང་། ཨ་རི་དང་རྒྱ་ནག་གཉིས་ཀྱི་བརྡ་འཕྲིན་གྱི་འགྲན་རྩོད་སྔར་ལས་ཛ་ཇེ་དྲག་ཏུ་འགྲོ་ངེས་པ་ཁ་ཚོན་བཅད་ནས་བཤད་ཐུབ།
