ཉི་ཧོང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་འཛམ་གླིང་ནང་དུ་སྔར་བྱུང་མ་མྱོང་བའི་གཞི་གྲངས་བརྒྱུད་གཏོང་གི་བྱེད་ནུས་ཧ་ཅང་ཆེ་རུ་གཏོང་ཐུབ་པའི་6G ཐོན་རྫས་ཀྱི་པར་གཞི་ཆེས་སྔ་ཤོས་དེ་ཕྱིར་བསྒྲགས་བྱས་ཡོད།
འདི་ནི་ཉི་ཧོང་ནང་གི་ཚོགས་སྡེ་མང་པོ་ཞིག་གི་མཉམ་རུབ་ཀྱི་རྩོལ་བ་ལས་གྲུབ་པའི་འབྲས་བུ་ཆེན་པོ་ཞིག་ཡིན་ལ། འགྲོ་བ་མིའི་རིགས་ཀྱི་དྲ་རྒྱའི་འབྲེལ་མཐུད་ཀྱི་ལོ་རྒྱུས་ཁྲོད་ཀྱི་གསར་གཏོད་དང་མདུན་མཆོང་གི་གོམ་པ་ཞིག་ཀྱང་ཡིན།
6G་ཐོན་རྫས་གསར་པ་དེའི་གཞི་གྲངས་བརྒྱུད་གཏོང་གི་མགྱོགས་ཚད་ནི། སྐར་ཆ་གཅིག་གི་ནང་དུ། 100GB ཡིན་ལ། ཁྱེད་ཀྱིས་སྐར་ཆ་གཅིག་གི་ནང་དུ་HD སྤུས་ཚད་ཅན་གྱི་གློག་བརྙན་5་ཕབ་ལེན་བྱེད་ཐུབ་ཀྱི་ཡོད། དེ་ནི་ད་ལྟའི་5G ལས་ལྡབ་20་ལྷག་ཙམ་གྱིས་མྱུར་བ་ཡོད་སྟབས། སྐུད་མེད་འབྲེལ་མཐུད་ཀྱི་མགྱོགས་ཚད་དེས་འཛམ་གླིང་ཡོངས་རྫོགས་ཧོན་ཐོར་དུ་བཅུག་ཡོད།
མྱུར་ཚད་དེ་ནི་དངོས་ནས་ཡིད་སྨོན་འཆོར་བ་ཞིག་ཡིན་ནའང་། མི་ཚོའི་རེ་བ་མཐོ་དྲགས་མི་རུང་། གང་ཡིན་ཞེ་ན། 6G་མ་ལག་དེ་ད་ལྟ་གསར་གཏོད་ཀྱི་གནས་སྐབས་སུ་ཡོད་ལ། དྲ་བའི་མགྱོགས་ཚད་དེ་ནི་ཚོད་ལྟའི་ར་སྤྲོད་ཙམ་ལས་ད་ལྟའི་5G ནང་བཞིན་ཚོང་ལས་ཀྱི་ཁྲོད་དུ་དངོས་སུ་བཀོལ་སྤྱོད་བྱེད་མི་ཐུབ། ད་ལྟའི་5G་རྨང་གཞིའི་འཛུགས་སྐྲུན་གྱི་བཀོད་སྒྲིག་དེ་6G ཡོ་ཆས་ཀྱི་ཆེད་དུ་ཇུས་འགོད་བྱས་མེད་སྟབས། 6G མ་ལག་དེ་འགྲོ་བ་མིའི་རིགས་ཀྱི་འཚོ་བའི་ཁྲོད་དུ་དངོས་སུ་ལག་བསྟར་བྱེད་པར་རྨང་གཞིའི་འཛུགས་སྐྲུན་གསར་པ་ཞིག་དགོས་ཀྱི་ཡོད། 6G དེ་བཀོལ་སྤྱོད་བྱེད་པར་ད་དུང་ཡང་ལོ་ཁ་ཤས་འགོར་སྲིད་ཀྱི་ཡོད།
6G ཚན་རྩལ་གྱི་ནུས་པ་ལ་ཚད་བཀག་མེད་ལ། དེའི་མགྱོགས་ཚད་ནི་འགྲན་ཟླ་བྲལ་བ་ཞིག་ཡིན་པས། དེར་ང་ཚོའི་འཚོ་བར་སྔར་མེད་པའི་མྱོང་སྣང་གསར་པ་ཞིག་བསྐྲུན་པའི་ནུས་པ་ཡོད། མི་རིང་བར་དྲ་རྒྱའི་འཇིག་རྟེན་དུ། མིས་བཟོས་རིག་ནུས་དང་ལྷན་དུ་དངོས་ཡོད་དང་རྟོག་བཟོ་འདྲེས་མའི་ཁོར་ཡུག་ཐུན་མོང་མ་ཡིན་པ་ཞིག་བསྐྲུན་ངེས། ཕུགས་བསམ་དེ་མངོན་འགྱུར་བྱེད་པར། ཉི་ཧོང་གི་ཚོགས་སྡེ་དེ་དག་གིས་མུ་མཐུད་ནས་རྨང་གཞིའི་འཛུགས་ཀྱི་ལས་གཞི་ཁག་གི་ཐོག་ཏུ་ཤུགས་སྣོན་རྒྱག་དགོས། དེ་ལྟ་བྱས་ན། ད་གཟོད། མདུན་བསྐྱོད་ཀྱི་ལམ་བུ་དེ་ནི་དཀའ་ཚེགས་ཆེ་རུང་། མི་འགྱངས་བར་འགྲོ་བ་མིའི་རིགས་ཡོངས་ཀྱི་ད་ལྟའི་འཆར་སྣང་ཁྲོད་ཀྱི་རྨི་ལམ་དེ་མངོན་འགྱུར་བྱེད་ཐུབ།
